استكثرك وقتي على وغدا بك

استكثرك وقتي علـي و غـدا بـك
عادة زمانـي كلمـا طـاب هـون

ليـت الـذي وداك يازيـن جابـك
تشوف عقبك كيـف الايـام سـون

شرق مشيت و غرب وقتي مشى بك
و القلب مالـه لايـم فيـك لـو ون

عقب الهنا بك ذاق لوعـة عذابـك
تلـونـت دنـيـاه ولا تـلــون

طويتني طي الـورق فـي كتابـك
حتى معاليق الحشـا لـك تطـون

اشتقت لايام الهـوى فـي جنابـك
يوم الشموع بليل الاحبـاب ضـون

واشتقت اقول لهاتفك مرحبـا بـك
و اشتقت لغيوم الصحـاري تكـون

عود ترى داعي الهوى عند بابـك
وارو القلوب اللي بعد مـا تـرون

غنيت لك عمري ولا جـا جوابـك
واسمي مع مجنـون ليلـى تـدون

خالد الفيصل